Anzelos in Chelu

Una oche de dolore s'est pesata,

non b'at nudda chi potat  cussolare

su prantu de sa mama disisperata

e su babbu non potet atzettare 

su dolu mannu de su izzu istimatu,

chi appossiande in su frore de sos annos,

in sa Luche de su Chelu ch’est ‘olatu.

Maria chi cumprendet sos affannos

dai Susu bos diet cuffortu e azutu

e forza e corazu in custa die 'e luttu.

Da s'ispada chi su coro bos at fertu 

Nde accat ocrire un ateru frore apertu

Custu modu solu tenzo de ispriccare

pacas rimas ebbia, a bos abbratzare

Pasca Manna pro sa Pache

Tòrranos sa Pasca, Sennore!

Dàinos sa Pache in sa Terra!
Tzelen sos lampos de sa gherra
Tzelen odiu, velenos e rancore

Pro sa Sua dolorosa Passione
Tene pietate de su mundu intreu!
Pro sa Ruche Sacra dai recreu
E sa Pasca de Resuressione!

De sa pretziosa sacra Ruche
Arbore d'eterna vita vera
Juchimos animosos un'ispera
chi torret dai Susu sa Luche

Arbore de Sole luchente
Sinnale de s'Onnipotente
Consolazione a su credente
Recattu pro onzi mortale

Arbore eterna, celestiale
Nos diet pache e amore
chi Zesusu Redentore,
ponzat remediu a ogni male

Arbore ‘e Ruche de sarvamentu 
Ascurta in Terra ogni lamentu!
Arbore istimata, beneita pianta,
dàinos a tottus sa Pasca Santa!

Su Battijare de Rachele

In custa die luchente de beranu
carignu a su coro, durche mele
ses tue, froricheddu galanu,
prenda pretziosa, bella Rachele!             
 
chin s’istireddu de su battijare
pares isposa de bellesa rara
a retzire in supra s’altare
su Sacramentu de cristiana
 
onorabbonas, netichedda cara!
chi s’Ozu Santu e s’Abba Beneita
ti dien fortuna, salute, longa vita
bonu coro e mente crara
 
luchizata de grassias siet sa via
allicchidita de pache e amore
frorizzata de gosos e allegria
e bonistrinas dae su Sennore.

Annu nou 2024

Intrat s’annu nou a passu lezzeru
e bisos e disizos piccan bolu
e sos pensamentos e s’isperu
ziran chin su tempus curridolu

Atera pazina, ateru fozu biancu
de iscriere in su libru de sa vita,
sien bonas novas, assumancu,
pinturas galanas chin s’iscritta

Chi s’annu nou accattet sa via
frorizzata de gosos e durcore,
onzi die de salute e losania,
onzi passu de pache e amore

Benennitu anno nou luchente,
tesse in oro sas tramas de sas dies!
Su tempus siet amicu, bona zente,
bono prinzipios e menzus fines

 

Augurios a chent’annos coro meu

Augurios a chent’annos coro meu
Son settantasette ziros de chelu 
Chi in ocros nde tenes su colore
Augurios, metas annos chin amore

Su tempus bolat, gai est decisu
Niunu tenet potere 'e lu firmare 
Mantene in coro gosu e sorrisu
Impare andamus a imbezzare

Non tenimus ateru pensamentu
Solu de sichire a nos istimare 
Finzas chi bat luche, onzi momentu
Senza timore de su chi potet capitare

Finzas chi b'est amore e passione
chi nos cherimus che sa prima die
Consolu mannu tue a mie e jeo a tie
Nos damus in donzi situassione 

Augurios a chentannos coro meu
Mantene su surrisu, senza anneu
Regosizamus su tempus impare
Augurios a chent’annos a campare

Agenda 2024

 

https://ilmiolibro.kataweb.it/libro/poesia/667037/agenda-2024/ 

Anche quest'anno è disponibile l'agenda della pace

Agenda multietnica, interculturale con le feste e le riccorrenze di tutti i popoli del mondo. Aforismi e citazioni di profeti, poeti e filosofi.

Pasca Manna 2023

Pasca manna de Resuressione
Bona Pasca a su mundu intreu
Misericordia, pache e ricreu
in su coro de ogni pessone

Pasca Manna siet de allegria
ca comente nos an contatu,
Gesù Cristu, fizzu de Maria,
pro nois est ressussitatu

Pasca Manna de liberazione
Sa morte in gloria at mutatu
A tre dies da sa crutzifissione
supra su male at trionfatu

An bistu aperta sa losa
anzelos chin beste luchente
Bona Pasca armoniosa
Augurios a tottu sa zente

Pasca manna de su Redentore
fortzeri riccu de ogni vertute
Pasca manna de eternu Amore
dona nos grassias e salute

Pasca Manna beranile
Siet de gosu in tottu sa Terra
Su toccu de su campanile
Che ochet onzi sonu de gherra

Pasca Manna siet aberu
de pache, amore e ditzosia
A tottus un auguriu sinzeru
Bona Pasca in cumpanzia

Traduzione:
Pasqua di Resurrezione
Buona Pasqua al mondo intero
Misericordia, pace e gioia
nel cuore di ogni persona

Pasqua sia di allegria
Perché come ci han raccontato
Gesù, figlio di Maria
per noi è risuscitato

Pasqua di Liberazione
La morte in gloria ha trasformato
Al terzo giorno dalla crocifissione
sul male ha trionfato

Hanno visto aperta la tomba
e angeli in vesti lucenti
Buona Pasqua armoniosa
Auguri a tutte le genti

Pasqua del Redentore
Forziere ricco di ogni virtù
Pasqua di eterno Amore
donaci grazia e salute

Pasqua primaverile
sia di piacere a tutta la Terra
Il tocco nel campanile
mandi via ogni suono di guerra

Pasqua sia davvero
di pace, amore e allegria
A tutti un augurio sincero
Buona Pasqua in compagnia